:: AhMeD AfIfY ::

السلام عليكم ورحمة الله وبركاته

وحشتوني جدا جدا جداااااااااااااااا

بجد كنت كل يوم مشتاق اني اكتبلكم علشان اشوف تعليقاتكم بس الصراحة مكنتش بقدر اكتب اي حاجة

رغم اني مجهز كذا موضوع على ورق علشان اكتبه

بس النهارده احساسي حاجة تانية خالص خلاني اكتبلكم من غير ما اجهز الموضوع على اي ورق

والسبب في كده اني لسة راجع من مدرسة ابتدائي حالا دلوقتي

كان عندي ميتنج هناك مع المديرة بخصوص شغل ومش عارف اوصفلكم ازاي كنت فرحان

وانا واقف قدام الفصول ببص ع الاطفال

وهما قاعدين جنب بعض كل 3 في ديسك واللي بياكل واللي المدرس بيشرحله واللي بيلعبوا

والبنوتات العسوله اللي عاكستهم طبعا

وفي الحوش بتاع المدرسة والاطفال بيجروا ورا بعض ويلعبوا والضحكة البريئة اللي مش مخبية ولا شايله اي هموم وراها

ضحكة صافية جميله برئية

ساعتها افتكرت كل ايام الطفوله وايام ابتدائي وشفت كمان مدرس انجليزي كان راعبنا

كان في حصة بيسمع لنا ع السبورة وخلى كل العيال يكتبوا كلمة واحده وانا خلاني اكتب جمله كامله

وغلطت في حرف واتضربت ساعتها

بس بجد كنت فرحان قوي ومر قدامي في النص ساعه اللي قعدتها شريط 5 سنين ابتدائي كله

ياااااااااااه بجد مش عارف اوصفلكم ازاي

اتمنيت فعلا ان الايام دي  ترجع تاني

.:: السلام عليكم ورحمة الله وبركاته ::.

امبارح اثناء مشاهدتي لبرنامج البيت بيتك كان فيه فقره بيتكلموا فيها عن سن الثلاثين "30" وعن الشباب اللي بتوصل للسن ده سواء اولاد او بنات والحياه بتبقى بالنسبة ليهم عامله ازاي

الصراحه ساعتها جت في بالي شوية اسئله

1- لما الشاب يكون طموح ونفسه يعمل حاجة لنفسه ولبلده ونفسه يتعلم ويبقى حاجة وبالفعل يتعلم ويتخرج بتقديرات كمان بعدها يلاقي نفسه مطالب انه يدخل الجيش ويدخل لانه حابب وطنه ولما يخرج عايز يشتغل ويكون نفسه علشان زي مابيقولوا يكمل نص دينه ويتجوز

فجأه يلاقي نفسه كبر و مايلاقيش شغل خالص بمؤهله او من غير مؤهله ويكره حياته كلها ويسب ويلعن في كل دقيقه ضيعها في حياته علشان يذاكر فيها وكل دقيقه ضاعت وهو في الجيش

ويندم انه ماتعلمش  ""حرفه"" من صغره وانه فضل الدراسة عن الشغل

*يبقى مين المسئول*

2- لما تلاقي الشاب نفسه يهرب من الجيش واللي عايز يسيب البلد ويسافر لانه "طهق" من حياته

*يبقى مين المسئول*

3- لما اللي يرضى يشتغل باي شغلانه يلاقيها قدامه علشان مايبقاش عاطل ويقدر يصرف على نفسه

فجأه يلاقي ان مرتبه مش مكفي حتى اكله وشربه ولبسه

*يبقى مين المسئول*

4- لما تبقى مش عارف تعمل اي حاجة في حياتك لمجرد انك ماعندكش "واسطة"

*يبقى مين المسئول*

5- لما البنت توصل لسن متأخر جدا وماتتجوزش والحياه تبقى سودا قدامها

*يبقى مين المسئول*

لما ,,, ولما ,,,, ولما ,,,

ياريت حد يجاوبني ويرد عليا بس مش تودونا في داهيه الله يخليكوا

السلام عليكم ورحمة الله وبركاته

ازيكم عاملين ايه وحشتوني جدا والله

زي مانتوا شايفين من العنوان اي كلام وخلاص

يعني انا مش عارف هاتكلم ف ايه ولا هاقول ايه

بس حاسس اني عايز اتكلم معاكم شوية

مش مهم هاقول ايه ولا هاتكلم ف ايه

بقالي كتير ماتكلمتش معاكم ولا حكيتلكم على مواقف بس بصراحة الموووود زفت ع الآخر

مش مشجعني على اي كتابه خالص

اكون قاعد عمال اضحك واهزر ونتكلم ومره واحده اسكت ويكلموني ماردش عليهم

مخنوق قوي من نفسي ومخنوق من الحاله اللي وصلت ليها

نفسي يرجع بيا العمر 3 او 4 سنين بالظبط

بس لللأسف الواحد مش بيحس بالحاجة الا بعد فوات ااوان ومش هايفيد بحاجة الندم دلوقتي

ساعات بحب اكون لوحدي ولما ببقى لوحدي بحتاج لصحابي وبدور على اي حد اتكلم معاه غريب مش كده

لو طلعت اتمشى مش فيه جديد نفس الشوارع ونفس الناس

هاعمل ايه تاني

نفسي اسافر بعييييييييييييييد وابعد عن ناس كتير وفي نفس الوقت فيه ناس ماقدرش ابعد عنهم

نفسي اطير فوووووووووووق واشوف الناس كلها على حقيقتها

عامل زي اللي ماشي في طريق مش شايف اخره
نفسي يوضح ولو معالم بسيطة منه

ونفسي ,, ونفسي ,, ونفسي…..

معلش طولت عليكم شوية ويمكن دي تدوينه نكد شوية مش زي مانتم متعودين بس هارجع واقول

ياربي لك الحمد كما ينبغي لجلال وفضلك وعظيم سلطانك

السلام عليكم ورحمة الله وبركاته

الاول ماتتخضوش بس دي محادثة حصلت بيني وبين واحد ماكنتش اعرفه ولا هو يعرفني

بس هو شخصية لذيذه جدا ودمه خفيف وبعدين اتعرفنا على بعض وكله ف اللذيذ

يالا معايا اقروا المحادثة

awalk_to_remmebar: هالوووووووو
AhMeD AFiFy: هلا
awalk_to_remmebar: هل يمكننى التعرف على شخصيتك
AhMeD AFiFy: نعم يمكنك
AhMeD AFiFy: من حضرتك
awalk_to_remmebar: انا حمزة بن عبدالله بن ابو سفيان بن الراسى
awalk_to_remmebar: ومن انت ايها الغريب
AhMeD AFiFy: ياهلا بابا العرب
AhMeD AFiFy: انا المدعو احمد بن عفيفي شيخ هذه القبيله
awalk_to_remmebar: يا هلا يا هلا بشيخ القبيلة
AhMeD AFiFy: ياهلا بك
awalk_to_remmebar: هل تتاجر فى الاغنام
AhMeD AFiFy: لا والله ان خسارتها لكبيره
AhMeD AFiFy: وانا لا احب الخساره
awalk_to_remmebar: يا مرحبابا بكير التجارين
awalk_to_remmebar: اننى اتاجر فى الاسماك واللؤلؤ
AhMeD AFiFy: ياللهو
AhMeD AFiFy: ياللهول
AhMeD AFiFy: احنا لاعظم التجارات
AhMeD AFiFy: وبكم تبيع
awalk_to_remmebar: هذا سر ا بيننا يا رجل
AhMeD AFiFy: انني لا اريد منك الا الشراء فقط
awalk_to_remmebar: اننى املك جوالا n95
AhMeD AFiFy: واااااااااااااااااو
AhMeD AFiFy: يالها من صدفةِ
awalk_to_remmebar: لماذا
AhMeD AFiFy: انني املك نفس الهاتف
AhMeD AFiFy: هل هاتف المطور ام الاصدار القديم
awalk_to_remmebar: يا شيخ القبيلة انى ادعوه جوالا وليس هاتف اننا فى عام الفين وتسعه
AhMeD AFiFy: يا ابا العرب انت تعلم تماما ان كل قبيله ولها طريقتها الخاصة بالتحدث
AhMeD AFiFy: واللغه
awalk_to_remmebar: هل تعتقد كبير تجار الاسماك واللؤلؤ يملك جوال كام سعره
awalk_to_remmebar: صدقت يا شيخ القبيلة
AhMeD AFiFy: انا شريته ب الفات ومائتي دينارا
AhMeD AFiFy: انت بكم شريته
awalk_to_remmebar: اكياسا ام شيكا على بياض
AhMeD AFiFy: لالالا كياسا
AhMeD AFiFy: عدا ونقدا
AhMeD AFiFy: دينارا دينارا
awalk_to_remmebar: اننى اشتريت جوالى بخمسون الف دولارا
AhMeD AFiFy: دولارا
awalk_to_remmebar: على المنضضة
AhMeD AFiFy: اي قبيله تستخدم هذه العمله الغريبة
awalk_to_remmebar: انهم الفرنجة
AhMeD AFiFy: ياللهول
AhMeD AFiFy: اتستعمل عملتهم
AhMeD AFiFy: وتتعامل معه
awalk_to_remmebar: اى نعم
AhMeD AFiFy: معهم
AhMeD AFiFy: خسئت
AhMeD AFiFy: انهم اعدائنا
awalk_to_remmebar: اننى بزنس تاجرا
AhMeD AFiFy: يا اخا العرب هذا لايمنع اننا لابد الا نتتاجر معهم
awalk_to_remmebar: اعطيك سرا ولا تقولوا لاحد انه سر خطير جدا
AhMeD AFiFy: تفضل
AhMeD AFiFy: سرك في هذا البير
awalk_to_remmebar: انا من ساعد فى تفجير الابراج العالميه لكى امنع جميع التجار ان ينافسونى
AhMeD AFiFy: ياللهول اءنت من فعلت ذلك
awalk_to_remmebar: اى نعم
AhMeD AFiFy: يا ابا العرب لاتخبر احدا بذلك
AhMeD AFiFy: الا تعلم ان الشبكة العنكبوتية مراقبة
awalk_to_remmebar: يا شيخ العرب عيبا عليك هل تريد ان اذهب الى الجحيم بقدمى
AhMeD AFiFy: انت الذي تقول
AhMeD AFiFy: ليس انا
AhMeD AFiFy: انا فقد اقوم بنصحك
AhMeD AFiFy: حتى لاتقع في الخطأ ثانية
awalk_to_remmebar: اننى احبتتك كثير ولهذا اعطيتك سرا لم افشى به لاحد من قبل
AhMeD AFiFy: الله يدوم المحبة بيننا
AhMeD AFiFy: اذا افصح عن نفسك
AhMeD AFiFy: وقل لي من انت
awalk_to_remmebar: يا الاهى
awalk_to_remmebar: اننى افضحت عنى من جزور شجرة العائلة حتى انا
AhMeD AFiFy: ويحك اتعتقد انني لا اصدقك
AhMeD AFiFy: ولكن اريد ان أتاكد
awalk_to_remmebar: يا شيخ العرب بصراحه اننى اريد انا اتزوج نساء من قبيلتكم
AhMeD AFiFy: لا هذا امر مرفوض في عرفنا
awalk_to_remmebar: اننى املك جوارى كثيرا ولم يعجبنى احد منهم وكل جارية من دولة
AhMeD AFiFy: فبنت القبيلة لاتتزوج الا من ابن القبيله
AhMeD AFiFy: لا يدخل احدا غريب في قبيلتنا
awalk_to_remmebar: يا رجل هذا كان زمان
AhMeD AFiFy: حتى الآن
AhMeD AFiFy: نحن نتمسك بعرفنا وعرف اجدادنا
awalk_to_remmebar: اننا فى عصر اى شاب يتزوج امراء حتى لو كانت يا بانية
AhMeD AFiFy: يابانية
AhMeD AFiFy: ماذا تقصد
AhMeD AFiFy: اهي اساءة ؟
awalk_to_remmebar: اى نعم
awalk_to_remmebar: لالالالا لا سمح الله
AhMeD AFiFy: اتسئ لنا
AhMeD AFiFy: وسحك
AhMeD AFiFy: ويحك
awalk_to_remmebar: ويحك انتا يا رجل
awalk_to_remmebar: اننى رايت من قبيلتكم شابه جميلة ورشيقة القوام وعيونها خلابه
AhMeD AFiFy: لكني قلت لك لانستطيع زواجك منها
awalk_to_remmebar: اننى سادفع مهرا غاليا جدا لن يدفعة احدا من قبل
AhMeD AFiFy: نحن لاننظر الى هذه الاشياء ابدا
awalk_to_remmebar: وساشترى لها جملا الى يدعون اليه سفينة الصحراء
AhMeD AFiFy: فرعفنا وعاداتنا وتقاليدنا فوق كل شئ
awalk_to_remmebar: اننى اريد هذه الفتاة وهى ايضا تريدينى
AhMeD AFiFy: نعم !!!
awalk_to_remmebar: انها اعطتنى رقم الجوال الذى تملكة
AhMeD AFiFy: اهي تريدك
AhMeD AFiFy: ياللهول
AhMeD AFiFy: متى حدث ذلك
awalk_to_remmebar: ونبث لبعضنا الرسائل الرومانسية
AhMeD AFiFy: اذن فسوف تقتل هذه الفتاه
AhMeD AFiFy: وانها الحرب
AhMeD AFiFy: الحرب
AhMeD AFiFy: الحرب
awalk_to_remmebar: ويحك يا رجل ان مرض السكر منتشر هذه الايام وانتا شاب والقبيلىة تحتاجك
AhMeD AFiFy: لالالا انها الحرب
AhMeD AFiFy: فلنعد العدة
AhMeD AFiFy: ونقاتلكم
AhMeD AFiFy: فشرف القبيله فوق كل شئ
awalk_to_remmebar: هل تريد ان تعرف اسم هذه الفتاة
awalk_to_remmebar: ولكن لا تغضب
AhMeD AFiFy: قول حتى اقتلها
awalk_to_remmebar: انها هيفاء بنت الحج وهبى عم شيخ القبيلة
awalk_to_remmebar: انها فتاة رائعة جدا
AhMeD AFiFy: يارجل لقد فذعتني
AhMeD AFiFy: انها لييست من قبيلتنا
awalk_to_remmebar: هل انتا على صدق يا رجل
AhMeD AFiFy: نعم
AhMeD AFiFy: انها من القبيله المجاورة
awalk_to_remmebar: يا الاهى
awalk_to_remmebar: اننى اسف جدا يا صديقى
awalk_to_remmebar: هل تريد منى شيئا اننى ساذهب الى نوم الان
AhMeD AFiFy: اايوة انت مين بقى
awalk_to_remmebar: استودعك الله

توووووووووووووووووط

من هنا بيقى اتقطعت المحادثة وعرفت هو مين

السلام عليكم ورحمة الله وبركاته

اولا  علشان ماحدش يفهم غلط ابو تريكة من اكثر لاعيبة الكورة انا بحترمهم رغم اني زملكاوي لكن مايمنعش اني بحب واحترم ابو تريكه

ومصر كلها بتحبه لانه فعلا شخصيه تستحق الحب

لكن مش لدرجة انها توصل ان امام مسجد يخصص خطبه كامله عن ابو تريكة

ليه بقى ونبي ولامؤاخذه واحنا مانعرفش !!!

اتفضلوا اتفرجوا ع الفيديو واحكموا

http://www.youtube.com/watch?v=fp4B0h2t_tY

الشيخ الفاضل عمال يتغزل فيه ويتغزل في شرابه والشوز بتاعه

ويقولك ياريت كل الشباب ياخدوا ابو تريكة قدوة ونبقى كلنا ابو تريكة

فيه ايه ياعم الحاج ابو تريكة ده بشر زيينا مش رسول ولامؤاخذه علشان تخصص خطبة كامله عليه

واذا كان اللي بيتكلم مجنون فالمستمع عاقل

لا ده الناس عماله تقول الله الله  الله

!!!

بس حقك مانت مش لاقي اللي يحاسبك ولا يقولك ده غلط ويقلعك العبايه اللي انت لابسها دي

لا حول ولا قوة الا بالله

اللهم لاتؤاخذنا بما فعل السفهاء منا

السلام عليكم ورحمة الله وبركاته
وحشتوني جدا والله ,, وعارف ان هبلي ورخامتي وحشتكم زي ماوحشتوني
مش عارف ابدأ معاكم منين بس النهارده عايز اتكلم على شركات المحمول وخصوصا اتصالات
اللي متابع معايا المدونة من حوالي اكتر من سنه ونص وتحديدا 6 مارس 2008
كتبت موضوع عن فودافون ورابط التدوينه اهو
http://www.ahmedafi.com/?p=23
حكيت فيها ان انا اتنصب عليا كتير من فودافون واخيرا حولت اتصالات
نيجي للمهم بقى اول ماشغلت اتصالات لقيت 5 جنيه اتخصمت من الرصيد قولت مش مشكلة يمكن علشان الخط كان موقوف
بعدين كان المفروض ان فيه دقايق مجانية كل شهر بيتنزل تلقائي بس ماكنتش بلاقي حاجة
اتصل بخدمه العملا يقولولي علشان خطك كان موقوف فالخدمه انتهت
قولت مش مشكلة مش هاتيجي على ال 3 قايق دول
لحد دلوقتي ادخل على السجل عندي الاقي فيه مسجات وصلتني من ناس بس ادخل ع الانبوكس مش الاقي حاجة
اتصل بالخدمة تاني يقولي مافيش عندنا مشكلة يمكن من الشبكة اللي بتبعت مع ان مافيش الا انا اللي بتحصل معاه الموضوع ده وزاد عن حده قوي
وحكايه ان لو حد اتصل بيا وانا تليفوني مقفول يبعتلي رساله بالرقم كانت من احدى خدمات اتصالات المميزة اللي نزلت عروضها بيها
وده من احد الاسباب اللي خلتني اشتري الخط ده
اول ماشغلت الخط لقيتها مش شغاله برضه ولما اتصلت بخدمه العملاء قولولي ان فيها عطل
وكل ما اتصل يقولي نفس النظام
دلوقتي من فتره قريبه جدا عرفت ان الخدمة شغاله بس لازم اعمل تحويل للمكالمات على رقم معين
مع ان المفروض يتم الاعلان عن الخدمة دي ولو حتى ف الموقع الرسمي
لكن قولت مش مشكلة اشتركت فيها وساعات بيبعت رسايل وساعات لا
افاجئ دلوقتي ان اتصالات باعتالي رساله تقولي ان الخدمة دي مستمره معايا مجانا ليوم 29/9 ولو عايز اجدد الاشتراك هايبقى ب 5 جنية شهريا
ايه النصب ده بقى !!!
انتوا دخلتوا علينا بعروض وهميه والكل صدقكم وشوية شوية بتسحبوا مننا العروض دي
مرة الدقايق المجانية ومرة الخدمات دي عملتولها تسعيره
على رأي المثل سكتناله دخل بحماره
كل مرة نسكت ونقول مش مشكلة وهما بيزيدوا فيها اكتر
حرام عليكم ارحمونا بقى من النصب بتاعكم واتقوا الله
الحل الوحيد ان الواحد يشتري تليفون ارضي ويعلقه ف الحزام بتاعه بس برضه المصرية للاتصالات ماتقلش عنهم شئ ف النصب
بجد حسبي الله ونعم الوكيل فيكم

السلام عليكم ورحمة الله وبركاته

 مش عارف ابدأ منين بس عموما ده حوار حصل بيني وبين نفسي

مش عارف فعلا احنا في رمضان شهر الرحمة والمغفره ولا في إيه بالظبط

وكل سنة وانتم طيبين

يالا بينا نشوف الحمار "قصدي الحوار"

نفسي تسألني :: هو احنا في رمضان

سمعتهم في التليفزيون بيقولوا كده

هو إيه التليفزيون ده ؟؟؟

ده خليفة الشيطان

طب الناس اللي في الشارع بتتعارك مع بعضها دي صايمة

ماهي علشان صايمة بتتخانق

ليه هو الصيام بيخلي الناس تتخانق

 أهو كل واحد يقولك انا صايم ابعد عني وبعدين يتخانقوا

لا حول ولا قوة الا بالله

طيب البنات اللي داخلة الجامع باللبس لاضيق والمكياج ده داخلين يعملوا ايه

يصلوا

ايه يعملوا ايه

ي ي ي يصلوااا

يصلوا ايه بالظيط

التراويح

تراويح ايه

اللي بعد العشا

ايوة ياعم عارفها ,,, يعني هما داخلين يصلوا لربنا يعني

أه المفروض بس مش قوي كده يعني

لا حول ولا قوة الا بالله

بقولك إيه انا زهقت هو احنا في رمضان ؟؟؟؟

والله ياخويا مابقيت عارف حاجة

طيب انت مين

إنت بتستهبل !!!!

إيه ياحبيبي انت تايه ولا إيه

أنا تهت من زماااااااااااااان

السلام عليكم ورحمة الله وبركاته

والله الواحد اليومين دول مخنوق ع الآخر ومش جاي ليه نفس يكتب اي حاجة

ولا عارف اكتب حاجة بس ماينفعش رمضان ييجي ومش اقولكم كل سنة وانتم طيبيين

ربنا يعوده علينا بالخير واليمن والبركات

ماتقلوش كتير في الاكل

يعني مثلا في السحور اتسحروا كوارع والفطار بيض وجبنه

انتظروني في التدوينة الجديده بعنوان (……..) لما اعرفها هابقى اكتبها

يالا سلاموووووووووووز

السلام عليكم ورحمة الله وبركاته

وحشتوووووووووني قوي بجد كنت ضايع من اول ما المدونة اتقفلت حاسس ان فيه حاجة ناقصاني

حبيت ارجعلكم بحاجة جديده وان شاء الله مش تزعل حد مني

وكمان بمناسبة ان النهارده يوم 7/8 يعني يوم مختلف كل الاختلاف عن كل ايام السنة

يوم عظيم عظيم عظيم الحكومة حتى بتفكر تديه اجازة

علشان في اليوم ده مولد الزعيم المتواضع العبد لله

*************

وبقولها برضه انا عمري ماكنت شاعر ولا بدعي اني شاعر انا بس ساعات بحاول اطلع اللي جوايا واتمنى اني اتعلم الشعر

يالا خدوا دي وياريت فعلا تقولولي رأيكم

انا فين انا مين انا تايه ولا ايه

مش لاقي نفسي مش لاقي روحي حتى عمري مش لاقيه

دنيا غريبة شايفها ف عنيا مش فاهمها ولا فاهماني

بلد غريبة قدامي فيها الشوارع والحواري

ناس جديده غريبة عني اللي ماشي واللي قاعد

ياترى فيها كام واحد زيي تايه عن نفسه وعن خياله

سؤال وبسأله لنفسي كل يوم

ياترى انا كنت تايه ولا مسافر وعن حياتي كنت فين

حد يقولي حد يفهمني انا فين او انتوا اللي فين

هي دي مصر بلدي وهما دول ناسها

عندكوا اجابه ولا افضل تايه ولا اعمل اييييه !!!!!

حبيبتي ….

حين رأتك عيناي

قلبي اتفتحلك … ونفسي كمان

آه وربنا نفسي اتفتحت … مع انها كانت مسدوده ومش عارف آكل

حبيبتي ….

ليتك تزيديني شرفاً برؤياكي كل يوم

ارجوكي حبيبتي….

لا تخذليني وتمانعي طلبي

وحياة ابوكي ياشيخة توافقي بقى انا ببقى جعان ونفسي آكل

حبيبتي….

اوعي يابت تظني اني واخدك علشان مصلحة ولا حاجة لاسمح الله

مؤكد حبيبتي انك تعلمين ان الاكل بيساعد ع التفكير

فلذلك اريد ان أراكي حتى تنفتح نفسي على الاكل حتى استطيع التفكير فيكي

حبيبتي….

شفتي بقى يابت انا بحبك قد ايه