:: AhMeD AfIfY ::

السلام عليكم ورحمة الله وبركاته

وحشتوني جدا جدا جداااااااااااااااا

بجد كنت كل يوم مشتاق اني اكتبلكم علشان اشوف تعليقاتكم بس الصراحة مكنتش بقدر اكتب اي حاجة

رغم اني مجهز كذا موضوع على ورق علشان اكتبه

بس النهارده احساسي حاجة تانية خالص خلاني اكتبلكم من غير ما اجهز الموضوع على اي ورق

والسبب في كده اني لسة راجع من مدرسة ابتدائي حالا دلوقتي

كان عندي ميتنج هناك مع المديرة بخصوص شغل ومش عارف اوصفلكم ازاي كنت فرحان

وانا واقف قدام الفصول ببص ع الاطفال

وهما قاعدين جنب بعض كل 3 في ديسك واللي بياكل واللي المدرس بيشرحله واللي بيلعبوا

والبنوتات العسوله اللي عاكستهم طبعا

وفي الحوش بتاع المدرسة والاطفال بيجروا ورا بعض ويلعبوا والضحكة البريئة اللي مش مخبية ولا شايله اي هموم وراها

ضحكة صافية جميله برئية

ساعتها افتكرت كل ايام الطفوله وايام ابتدائي وشفت كمان مدرس انجليزي كان راعبنا

كان في حصة بيسمع لنا ع السبورة وخلى كل العيال يكتبوا كلمة واحده وانا خلاني اكتب جمله كامله

وغلطت في حرف واتضربت ساعتها

بس بجد كنت فرحان قوي ومر قدامي في النص ساعه اللي قعدتها شريط 5 سنين ابتدائي كله

ياااااااااااه بجد مش عارف اوصفلكم ازاي

اتمنيت فعلا ان الايام دي  ترجع تاني

السلام عليكم ورحمة الله وبركاته

وحشتوووووووووني قوي بجد كنت ضايع من اول ما المدونة اتقفلت حاسس ان فيه حاجة ناقصاني

حبيت ارجعلكم بحاجة جديده وان شاء الله مش تزعل حد مني

وكمان بمناسبة ان النهارده يوم 7/8 يعني يوم مختلف كل الاختلاف عن كل ايام السنة

يوم عظيم عظيم عظيم الحكومة حتى بتفكر تديه اجازة

علشان في اليوم ده مولد الزعيم المتواضع العبد لله

*************

وبقولها برضه انا عمري ماكنت شاعر ولا بدعي اني شاعر انا بس ساعات بحاول اطلع اللي جوايا واتمنى اني اتعلم الشعر

يالا خدوا دي وياريت فعلا تقولولي رأيكم

انا فين انا مين انا تايه ولا ايه

مش لاقي نفسي مش لاقي روحي حتى عمري مش لاقيه

دنيا غريبة شايفها ف عنيا مش فاهمها ولا فاهماني

بلد غريبة قدامي فيها الشوارع والحواري

ناس جديده غريبة عني اللي ماشي واللي قاعد

ياترى فيها كام واحد زيي تايه عن نفسه وعن خياله

سؤال وبسأله لنفسي كل يوم

ياترى انا كنت تايه ولا مسافر وعن حياتي كنت فين

حد يقولي حد يفهمني انا فين او انتوا اللي فين

هي دي مصر بلدي وهما دول ناسها

عندكوا اجابه ولا افضل تايه ولا اعمل اييييه !!!!!

ياجماعه انا مش شاعر ولا عمري اتعلمت الشعر بس ساعات الواحد بيطلع اللي جواه ويحاول يظبطه انه يمشي مع بعضه ودي آخر حاجة انا كتبتها وانا قاعد مع نفسي كده

ذكـــــريـــــــاتي

مبحر في بحر ذكرياتي

لا صديق لي ولا رفيق

افكر ف الماضي اكثر من الحاضر

ويتوه عقلي من التفكير

وحيداَ رغم كثرة الناس من حولي

اكره ان أهُــــــزَم او أزُلــ

ولكني هُـــزمت في اختيار صديقي

قيل معرفه الرجال كنوز

وكم اتمنى ان التقي بكنزاً واحداً

هموم الدنيا تشغلني … وامور الآخرة تقتُـلني

ياربي كَم اتَمنى رؤياك

ولكني اخشى من عَدم رٍضاك

ياااااااااااه !!

مافيش احسن من الامثلة المصرية الواحد فعلا بيحب يشجع منتج وطنة علشان انا شربت من نيلها ونيلها هو دمي - بس مدي على أحمر شوية   - فلازم نفتخر بأمثالها ونعمل بيها مهما حصل

اهو انا بقى كنت من النوع ده وعامل زي النجار اللي بابه مخلع بس الباب اللي مخلع مابقاش مخلع دلوقتي

كنت وانا صغير وبسمع المثل ده استغرب اوي ازاي نجار ومعاه المسمار والجاكوش على طول ويبقى بابه مخلع

وكان دايما سؤال غريب بييجي على بالي

كنت بقول دايما لو بابه مخلع طيب بيناموا ازاي والباب مخلوع  براءة اطفال بقى  خايف عليهم من الحرامية

انا بقى كنت دايما لما اجي اصمم مواقع للناس كانت تعجبهم والحمد لله آجي على موقعي انا واعمله تصميم زفت

لحد من حوالي سنة كده زهقت وماعملتش حاجة والموقع كان شغال لحد النهارده من غير تصميم اللي يدخل على الموقع يلاقيه ابيض ياورد مافيهوش صورة حتى

  لحد ماقررت اعمل وقفه مع نفسي - ايوة زي وقفة عرابي كده  - وقولت لازم احط حد للموضوع ده وقعدت مع نفسي قعدة وفتحت برنامج الفوتو بن شوب الكلام ده من حوالي 3 شهور  وعملت حته تصميم يادوب حطيت اللون وعملت شكل وقفلت على كده

اليومين اللي فاتوا بقى والحمد لله ربنا هداني وقولت لازم اخلصه علشان ده وجهة ليا ودخلت وكملت التصميم ولسة مخلصة دلوقتي وركبته على الموقع

رابط الموقع اهو

http://www.egplaza.com

بس برضه لسه الباب محتاج شوية مسامير علشان يتثبت

لسة ناقص شوية صفحات داخلية في الموقع علشان يكون كمل والحمد لله

اسيبكم انا على خير دلوقتي وعقبال كل نجار اما يصلح بابه على خير ان شاء الله

ازيكم يا جماعه

ايه اخباركم

النهاردة حدث عظيم جدااااااااااااااا حصل في سجلات الحكومة المصرية

حدث بيتكرر كل سنه مرة واحده بس

بيحصل يوم 1/8 في كل عام

حاجة عظيمة عظيمة عظيمة

اليوم ده الكل بيقف له 75 دقيقة حداد

قصدي بيقيموا له الافراح

طبعا كلكم عايزين تعرفوا ايه اللي حصل

طيب انزل لتحت شوية

كمان شوية

اصبر بس

هانت اهي

خلاص المخطة الجاية

النهاردة عيد ميلادي الثامن عشر بعد المائه

عايز الزغاريط تعلو المدونة وكل المدونات المجاورة

واللي مش هايجيب هديه هاعورة

دقه طعميه

ماتستغربوش من العنوان ايوة صح زي مانتوا شفتوا ده "دقه طعميه" يعني نظركم مش ضعيف ولا حاجة

مغامرة بتبين فيها مدى مهارتي وقوتي في تحضير الأكل بمختلف طعمياته يوه قصدي انواعه  

النهاردة قايم الساعة 6 الصبح ودي حاجة غريبة طبعا مش علشان انا قايم الصبح لا علشان انا نمت بالليل اصلا

العبد لله مابينامش الا الساعة 10 و 11 الصبح وممكن مانامش كمان

بعد الحادثة الغريبة اللي حصلت دي قمت وصليت وقعدت على كمبيوتري الحبيب وقعدنا ننت شوية بقى كان فيه موضوع الصراحة مشوق ماقومتش الا لما خلص

ولما قمت وكالعاده رحت ع الثلاجة فتحتها << دي حاجة اساسية عندي كل يوم لاده كمان كل نص ساعة

وعلى طول بتكسفني والاقيها فاضية << نحس بقى

انا بعد مافتحتها النهاردة لقيت ايه

خير اللهم اجعله خير

دقة طعميه

مش عايز واحد فتك يقولي وجت منين دي لان انا نفسي اعرف قبلكم

وده اساسا مش موضوعي المهم اني لقيت حاجة تتاكل

الحماس اتحرك جوايا عمال يروح يمين وشمال يمين وشمال

ياعم اثبت ابدا خلاص  الطاقة بتاعتي طلعت وقررت اقلي الطعميه

حطيت الطاسه ع البوتاجاز وحطيت الزيت وولعت البوتاجاز ووطيته ع الآخر وبدأت احط الطعميه

الطعميايه تكون في ايدي سليمة وعمال اعمل فيها بقى واساويها بالبرجل والمنقله وآخر ألسطه وفجأه اول ما احطها في الزيت الاقيها بقت حتت

احاول واحاول برضه نفس النظام قولت مش مشكلة يابوحميد كمل على كده

والاقي صوت اختي ورايا يقولي المفروض الزيت يغلي الاول قبل ماتحط الطعميه

علشان ماكسفش نفسي اكتر من كده خلاص قلت مش هاكمل واقلي دول ولما الزيت يغلي اكمل الباقي

انتهت المرحلة الاولى بنجاح والحمد لله بس مش عارف كده وانا بطلعها من الزيت حسيت بحاجة غريبة اوي

يمكن علشان شكلها مش شكل طعميه اساسا

المهم وانا بحط الباقى لقيت والدتي جت وبصت كده ع الطاسة وقالتلي اعمل على قدك ياحمد ماحدش هياكل معاك

مش علشان شبعانين لا ده علشان حاجة تانية اكيد كلكوا فهمتوها

وبعدين شالت الطبق اللي فيه الدقه من قدامي

يادي الكسوف

خلصت الحمد لله قلي وطلعته من الزيت وحطيته ع الصينية والجرجير والذي منه

والحمد لله بعد عناء شديد وجذب وشد قدرت اني اكل طعميايه واحده من اللي عملتهم

ازيكم يا جماعة اخباركم ايه…
معلش اتأخرت عليكم شوية اليومين اللي فاتوا مشاكل توقف الموقع وكنت مخنوق شوية

اي خدمة مارضيتش احط صورة لاي فار علشان الناس اللي زعلت
اكملكم بقى الموقف البطولي اللي انا عملته في موضوع الفار
فاكرينة …
وانا طبعا خايف على الفار مني ليحصله صدمة قلبية لما يشوفني ان يجيله اللامؤاخذة البواسير ولا حاجة
قعدت في الاوضة على الكمبيوتر وقفلت على نفسي علشان ماشفهوش واعمله حاجة
فجأه وبدون مقدمات
آتاني صوت ليس له شبيه
ماتقوووووم يابني آدم انت اعمل معانا شوية
ماتخافوش ده صوت ابويا عايزني اقوم اساعده في تحضير الاكل للضيف
اضريت وبكل اسف اني اقوف واقف معاه واساعده
مع ان وقوفي كان زي عدمه بس عادي بقى اديني شاركت وخلاص
نفس الصوت جالي تاني
تعال هنا علشان تخبط على المصيده اول ماسعادته يدخل فيها علشان هي بايظه مش بتقفل الا بالسك
مصيده قليله الادب بصحيح
طيب احنا ما اتفقناش على كده
انا لسة هارووح  هناك عنده
ايه الكلام ده
ماكانش قدامي الا حل من اتنين
اما اروح وامسك المأشه واستناه يدخل واخبط على المصيده
او
اروح وامسك المأشه واستناه يدخل واخبط على المصيده
انا بقى اخترت الحل التالت اللي ماقولتلكوش عليه
رحت مسكت المأشه واستنيته لما ظهر قدامي
قمت على طول خابط على المصيده
يالهووووووووي
ده لسة الفار مادخلش في المصيده اساسا
ماتخافش ياعم الحمد لله ربنا ستر والمصيده ماقفلتش
دي لو كانت قفلت من غير ما الفار يدخل ماكنتوش هاتعرفوا حاجة من اللي انا بكتبها دلوقتي
اصل ابوي بيعزني اوي
بس برضه الاصرار والعزيمة موجودين جوايا
استنيه لما دخل ووهوووووووووووب خبطت على المصيده
الحمد لله قفشناه بعد عناء ساعاااااااات
طيب مين اللي هايطلعوا بره ؟
لفيت نفسي بوطي وبمسكه
المصيده مش الفار وبطلعها في الشارع
ازاااااااااااااااااااااي ماحدش يسالني
انا عن نفسي عمال لحد دلوقتي عايز اعرف انا مسكته ازاي
وتمت الحكايه على خير والحمد لله وانتقل الفار الى الرفيق الاعلى وانا لله وانا اليه راجعون
ماجيلكوش في فار

السلام عليكم ورحمة الله وبركاته

النهاردة السبت

ماشي ايه الغريب في كده عادي زييه زي اي سبت في الاسبوع

لا النهاردة السبت اللي بييجي قبل الأحد اللي قبل يوم الاثنين اللي هو شم النسيم

عظمة على عظمة يابوحميد ايه الحلاوة دي عرفتها منين المعلومة دي

مش قولتلكم الذكاء الخارق

المهم يوم السبت ده بيبقى مميز جدا والموضوع ده انا كنت ناسيه ولسة شايف موقف دلوقتي هو اللي فكرني بيه

زماااااان واحنا صغيرين كنا بنعد لليوم ده من قبلها باسبوعين وكنا بنخاف نطلع في اليوم ده بالذات الشارع واحنا في المدرسة وراجعين كنا بندخل البيت جرررري

ده كله ليه

مش عارف بس اليوم ده كان بيحطوا للاطفال فيه كحل للعين غصب عنهم لييييه انا مش عارف بس نفسي اعرف

وكان بيبقى فيه ستات كبيرة في الشوارع من سكان الشارع نفسه بتمسك الاطفال وتحطلهم كحل

وكانوا معروفين وكنا نخاف نمشي من قدامهم

لحد الآن انا مش عارف ليه موضوع الحكل في اليوم ده بالذات

واللي كانوا بيسموه سبت النور ليه برضه انا مش عارف

وانا ماشي دلوقتي شفت بنت صغيرة متبهدلة كحل على عنيها

قمت على طول قلبت ذكرياتي واسترجعت اليوم ده منذ ايام الابتدائي وماقبلها وافتكرت ونفسي اعرف ايه سبت النور وليه الكحل في العين في اليوم ده بالذات

اشوف اسد ولا اشوفش فار

آه والله موتي والفران بس مش حكاية اشوفهم لا انما يلمسوني

ماحبش اي فار جلده وفروته تلمسني لو لمسوني جسمي بيقشعر واحط ايدي او رجلي اللي لمست الفار تحت المياه ربع ساعة وبرضه متطمنش 

انا مش بخاف منهم انا بس بخاف عليه هو مني علشان ماعملوش عاهة مستديمة او اموته ويكون ذنبه في رقبتي وحقوق الحيوان تقلب عليا فالطيب احسن وخلينا حبايب

ندخل في الموضوع على طول

امبارح بقى راجع البيت لا بيا ولا عليا الاقي ماما واختي في الصالة وابواب الاوض كلها مقفولة والبيت مقلوب  طبعا بذكائي الخارق اللي انتوا متعودين عليه استنتجت وقلت اكيد فيه حاجة مش طبيعية في البيت

فجأه الاقي اختي بتبصلي وبتضحك

لالالالالا انا مش متعود على كده هو ايه النظام اختاروا ريس جديد للجمهورية ولا اييييه

فيه ايه قوليلي البصة دي مش عاجباني

وعينك ماتشوف الا النور وسمعت الخبر المحتوم

فيه فار في البيت

يالهوووووووووووووي فار ياليلك اللي مش هايعدي ياحمد … طيب هو فين دلوقتي وسعادته شرف امتى؟؟

ترد عليا قائله وبكل ثقة وسرور ::

نايم مع بابا في الاوضه جوه

طيب كويس

ايييييييييه نايم مع بابا في الاوضة

يانهار اسود

المشكلة انه مش مع بابا في الاوضه ونايمين مع بعض ده عادي بالنسبة لبابا

المشكلة انه في الاوضه يعني لو موجود في الاوضة يبقى بذكائي برضة هايكون موجود لسة في البيت  ومع كده مش هايطلع الا الصبح ده لو طلع

يانهااااااار زي بعضه

انا اصطبحت بوش مين النهاردة ايه اليوم اللي مش طالعله نهار ده

طيب انا اعمل ايه دلوقتي ده فار مش كلب ولا تعلب دي مصيبة  فقمت بقى مشغل مخي شوية وبسرعة البرق اخدت القرار وجريت على الكمبيوتر وقفلت على نفسي وفتحته وقعدت على الكمبيوتر

قفلت الابواب والشبابيك وكل حاجة علشان الهوا مايعديش مش فار يعدي انسى ياعمرو

ادخل والصدمة التانية النت فاصل

هو انا قلت اليوم ده مش طالعلة نهار انا ماعرفش اقعد على الكمبيوتر الا ولازم يكون فيه نت والعمل الكمبيوتر بدون نت امامكم والعدو قصدي الفار من خلفكم

طبعا اختار كمبيوتر من غير نت هو العمر لعبه

دخلت على الفوتو ابن شوب وقعدت اخرف شوية وبعمل تصميم جديد للموقع فزهقت قمت قافله تانية

ادخل على الالعاب انا مابحبش العب

طيب اعمل ايه

دخلت على الافلام لقيت مصيبة قدامي

الافلام اجنبيه يانهار ابيض

هو انا عارف عربي لما اعرف انجليزي سيبك من الافلام

ببرص بطرف عيني كده الاقي مسلسل تامر وشوقية قلت حلو فتحته وقعدت اتفرج عليه وانسجمت

 والى اللقاء مع الجزء التاني ومرحلة امساك الفار والعمل البطولي اللي قمت بيه