السلام عليكم ورحمة الله وبركاته
كل سنه وانتم طيبين
بكرة رمضان ان شاء الله
ياريت تصوموا بقى وحكايه صينية الكنافه وتنزل تحت الكرسي دي ماتعملوهاش
واللي يفتح الثلاجة ويشرب ويقول نسيت بقت قديمة اوي
وانك تغسل وشك وتشرب وانت بتغسل دي بقت حركة مفقوسة اوي
يعني نسيبنا من الحاجات دي ونصوم بقى
وكل عام وانتم بخير
كل واحد لما يقوم من نومه او حتى لما ييجي يخرج لازم يقعد يبص ويبحلق في المرايه اوي على حلاوته يعني
انا واحد قريب اوي هاتجنن بخصوص البص في المرايات دي
ده اان خايف مرة ابص في مرايتي الاقي نفسي مش عارفني واللي مش فاهم يسأل عبد الباسط حموده
او حتى ابص في مرايتي ابكي وماعرفش انا مين ولا يكونش اتقسمت اتنين واللي مش فاهمني برضه يسأل شيرين
هما لازم كده يخوفونا من كل حاجة في حياتنا بعد كده من كتر الخوف الناس هاتطلع الشارع مش مسرحين شعرهم اه ماهما خافوا من المرايه بقى لتقلبهم حد مش عارفينه
ايه الكلام العويص ده !!!
من فتره خرج لنا المطرب الفذ عبد الباسط حموده باغنيه اسمها انا مش عارفني اكيد كلكم سمعتوها سواء كان في بيتكم او في الشارع او صاحبك مشغلها او في ميكروباص او في الافراح حتى
بذمتكم دي اغنيه تتقال في فرح
دلوقتي واحد بقاله سنين مابصش لمرايته ومش فاكر يبصلها الا لما كبر
طيب واحنا مالنا يعني ماكل الناس بتكبر جت عليك انت
قوليلي ايه يامرايتي قوليلي ايه حكايتي تكونش دي نهايتي واخر قصتي
شوفتوا تعبير الشاعر العظيم ومواطن الجمال
صور هنا المرايه بحد كده ممكن يكلمه << انا ساقط نحو مشوا الجمله دي ومش مهم تفهموها 
طيب قال يعني المرايه هنا هاترد عليه . كان ناقص يقول انه لما بيحرك ايده الشخص اللي قدامه في المرايه بيحرك نفس الايد
سبحان الله !!! تكنولوجيا ياجدع
لا ويقولك انا مش عارفني انا تهت مني انا مش انا
يعني نروح ندور عليه في الشارع التاني مثلا يعني
وكمان ازاي تاه من نفسه وهو مش هو
المرايات ماوقفتش لحد هنا في الاغاني
لا دي طلعت علينا كمان الفنانه شيرين بالاغنيه العظيمة المرايه
زي مايكون ماعدش فيه الا المرايات في البلد يغنولها
بس هنا الفرق بقى ان شرين مش بتسال المرايه
لا دي بتسال الشخص اللي جوه المرايه
الاغنيه طبعا معموله على فيلم اسف على الازعاج وانا لما شفت الفيلم عرفت سبب الاغنيه ايه
بصراحة الاغنيه هنا شديده ومش لاقي حاجة في الكلام اتريق عليه الصراحة ودور المرايه فيها كان بسيط
ونحن منتظرين ان شاء الله بالمطرب العبقري اللي هايغني للمشط والتسريحة
آتاني صديقي اسلام وكالعاده وانا بفتح له الباب ولسة مادلختش نط وقعد على الجهاز وبعد محاولات شد وجذب وكلام مطول وبتأثير شخصيتي القوية قعدت انا على الكرسي اللي جنبه
وكعادته قعد فتح احدى مواقع تحميل الاغاني اللي مش بيفتح غيره وقعد يحمل اغاني
انا : يالا يابني آدم عايزين نمشي
هو : استنى بس هو البوم واحد هانزله ونمشي
انا : يابني يالا لما نيجي
هو : استنى بس ده ثواني هانزل الالبوم ده
وانتظرنا وقعد ينزل اغاني وانا قاعد مستني سعادته
وفجاه جه عند سعد الصغير وعايز ينزل البومه
صحت فيه وقولتله لأ ابوس رجلك استر عليا الله يستر عليك بلاش ده
قالي ماتخافش والله الشريط ده رومانسي ومش شعبي خالص ولا فيه اغنيه شعبيه
قولتله بس يالا ماصدقكش ابداَ وحلفلي ووالله ماشعبي ياعم
واستسلمت للامر الواقع ونزل الاغاني وانا عمال ادعي عليه
من غير مايسمع طبعا
ومشينا وعدت الايام وبعدها ببص على الديسك توب فجأه [اه والله العظيم فجأه] الاقيه منزل اغنيه وحطها غلط على الديسك توب
اتهفيت في عقلي وقولت اسمع الاغنيه الرومانسية بتاعته
وياريتني ماسمعت ياخويا << ده انا سمعت الرعد في وداني
لا بجد اغنيه رومانسية خاااااالس ماااااااالس
قال ايه ياخويا بيقول فيها انا عازمك على العشا مش مشكلة ده طلع راجل كريم اهو وبيعزم الناس طبعا انا قبل ما اكمل الاغنيه الراجل ده جوعني قمت أكلت ورجعت
ما علينا
انا اول ما سمعت انا عازمك على العشا قولت ببببببس كفايه ده ارجوك استر عليا الله يستر عليك
شوف بقى الكرم بتاعه وصل لفين
عازمة على ربع كبد و1/8 حنان ومش عارف كام قلوب ومش عارف هايشربوا ايه
لا والاغنيه اللي هي اسمها كله من خيرك على ما اعتقد بيقولوا فيها كاس عذاب ومش عارف ايه
ايه ده فيه حد يقول لحبيبته الكلام ده
انا لو حبيت وواحده فكرت تنطق تاقولي الكلام ده هاقطعها بس الاول تعزمني على العشا <<اللي هو الأكل الحقيقي وبعدين نشوف حكايه التقطيع ده
مش هاقول الا منك لله يا اسلام
